Zimaidar Kon???

Zimaidar Kon???

Pakistan us sarzamin ka naam hai jis ne hamay aazaadi ke saath saath ek nai or masbat pehchan di. Is mulk ka qayam logo ke khuloos or qurbaniyon se mumkin hua. Lekin afsos ke aaj is masbat shanakht ko nuqsan pohnchayaa jaa raha hai. Aaj puri duniya me Pakistan ko badnaam kia jaraha hai, kahin dehshatgardi ke naam per to kahin be-imani or corruption ke naam per. Ye baat kisi had tak theek bhi hai, kyun ke aaj hamare mulk ki jo halat hai is baat se inkaar nahi kia jasakta ke jis maqsad ke tehat issay hasil kia gaya tha wo aaj hamay kahin nazar nahi aata. Pakistan ko azaad huwe 66 saal ho chuke hain, is ki halat bad se badtar hoti jarahi hai or hum is ka zimaidar hamare mulk k hukmurano ko samajhte hain, hum jab bhi Pakistan ki baat krte hain to yehi sochte hain ke shayad hamare mulk me agar marshal law nai laga hota ya jamhuri hukumat apni zimaidariyan puri  krteen to hamara mulk us maqam tak na pohchta jahan wo aaj hai.

Hamare mulk ka har nizaam kharab, har mehekma corrupt hai, lekin kia hamare zawal or badhali ka sabab sirf hamare hukmuran hai? kia hamara is me koi kasoor nai? Agar is surat-e-haal ka haqiqat pasandi se jaiza lia jaye to taswir ka dusra rukh hamare saamne ayaa hoga. Kon hai jo imtahan me nakal krta hai? Kon hai jo signal torne per traffic police ko rishwat dene ki koshish krta hai? Kon hai jo na-ahel hone k bawajud rishwat day ker nokriyon per qabza karta hai? Kon hai jo apni zaruraton ko pura krnay ke liye chori ka rasta ikhtiyar karta hai? Kon hai jo mehnat karne ke bajaye logo ko taawaan k liye agwaa karta hai or baaz aukaat un ki jaan lenay se bhi nahi ghabrata? Kon hai jo qaanoon ki girift se bachne k liye apne asr-o-rusookh ka istamal krta hai? Kon hai jo adaalaton se insaaf lenay ke bajaaye mujrimo se paise le kr bik jata hai? Kon hai jo is mulk ko  chor kar bhaag jaana chahta hai? Or sub se barh kar kon hai jo is mulk ki ye halat dekhnay ke baawajud khamosh hai? Kon hai jis ko sirf apne araam-o-sukoon se garz hai? Wo hamaare hukmaraan nahi balke hum khud hai. Bayhis or khudgarz….

Hamare muashray se insaaniyat, ek dusre ka ehsaas or apnay mulk ki mohabbat khatam ho chuki hai. Aaj hamara mulk jis halat me hai us k zimaidar hum hi hain. Hum apni galtiyon ko dekhne k bajaye dusro per ilzaam lagane ke aadi ho chuke hain lekin ankhain band kar lene se sachaayi chup nahi jati balke barbadi qoum ka muqadar zarur ban jati hai.

Yehi sahi wakt hai agar hum is mulk ki halat me tabdili lana chahte hai, to shuruaat apnay aap se karni hogi. Is mulk ka mustakbil hum se hai jese hum honge, wesa hi hamara mulk hoga, kyun ke logon se hi mulk bana karte hain.

Agar ab bhi hum log ahsas-e-zamaidari ke bajaaye ilzam tarashi me masroof rahe to is mulk ki takdeer koi nahi badal sakta….

Chand Lamhon Ka Zalzala...

24 Sept, Tuesday Ka Din Tha, Main University se Akar 4:30 Baje Ke Kareeb Khane Ke Liye Rotiyan Hi Bana Rahi Thi Ke Achanak Mujhe Cooking Range Hilta Hua Mehsos Hua, Mujhe Laga Shayad Mera Weham Hai Magar Phir Jab Ammi Ne Akar Kaha Ke Zalzala Aya Hai To Mera Weham Yaqeen Main Badal Gaya. Tasdeek Ke Liye Foran Tv Khola To Har Jaga Yehi News Thi Ke Sindh, Baluchistan aur Bharat Ke Dar-ul-Hukumat New Dehli  Main Zalzaley Ke Jhatkey Mehsos Kiye Gaye hain Jiss ki Shiddat Rector Scale Pe 7.7 Record Ki Gayi Hai Aur Markaz Baluchistan Ka Shehar Khuzdar Tha. Jab ke Karachi Main ALLAH Ka Shukar Hai Zalzaley Ki Shiddat 3.7 Thi Jo Ke Kafi Kam  Thi. Us Ke Bawajod Bhi Logon Main Khos o Haras Phel Gaya Aur Log Apne Apne Gharon Se Bahir Nikal Aye. Lekin ALLAH Ke Karam Se Sindh Main Kissi Bhi Kisam Ke Nuqsan Ki Itela Nahi Mili. Magar Kyun Ke Markaz Baluchistan Tha Isliye Baluchistan Main Zalzaley Se Barey Pemaney Par Tabahi Hui. Takreeban 21,000 Makanat Ko Nuqsanat Pohcha, Ibtida Main To Jan Bahaq Hone Walon Ki Tadad Kam Thi Magar Ab Tak ki Itelat ke Mutabik Jan Bahq Afrad Ki Tadad 400 Se Ziyada Ho Chuki Hai. Maqanat Ka Malba Girne Se Jahan Mawasalat Ka Nizam Buri Tarah Mutasir Hua Wahin Imdadi Karwaiyon Main Bhi Sakht Mushkilat Ho Rahi Hain. 

Collapsed mud house in Baluchistan

In Halakaton Pe Har Pakistani Gamzada Hai Lekin Zahir hai Hum Un Logon Ka Dard Nahi Samajh Sakhte. Who Jo Apne Gharon se Aik Dam Be Ghar Hogaye Hain, Achanak Apne Pyaron Ko Kho Chukey hain Un Pe Jo Guzar Rahi Hogi Us Ka Hum Sirf Afsos Hi Kar Sakhte Hain Magar Is Takleef Ka Andaza Wohi Jan Sakhte Hain Jin Par Yeh Takleef Beeti Rahi Ho. Hum To Yahan 2 Yah 4 Din Afsos Karain Ge Phir Apni Apni Zindagiyon Main Magan Hojayain Ge. Magar Un Ke Liye To Yeh Sari Zindagi Ki Takleef Hai. Sari Zindagi Ka Dukh Hai.

A family of Pakistani earthquake survivorss sit with their belongings near their collapsed mud house

Is Zalzaley Se Jahan Itni Tabahi Hui Wahin Hairat Angez Tor par Is Ki Shiddat Se Gawadar Ke Samandar Main Aik Jazeera Obhar Aya Jo Ke Sahil-e-Samandar Se 70 Fit Oncha hai Aur Jisey Zalzala Jazeera Ka Naam Diya Gaya. Is Jazeere Se methane Gas Ka Akhraj Ho Raha Hai Jiss Ke Wajah Se Jazeere Main Bulbuley Oth Rahe Hain. Yehi Nahi Balkey 2 Din Bad Isi Qisam Ka Aik Aur Jazeera Ormara Ke Sahil-e-Samandar pe Bhi Paya Gaya.

This image shows what appears to be a new island off the coast of Pakistan after the Sept. 24, 2013 earthquake struck the country.

Aerial photo of the Gwadar mud volcano (National Institute of Oceanography, Pakistan)

Pakistan Ke Bohat se Zalzaley Indian, Arabian, Aur Eurasian tectonic plates Ke Darmiyan Collision Ka Nitija Hain. Yeh Aik Haqeeqat Hai Ke In Zalzala Ko Predict Karne Yah Rokne Ke Liye Science Ab Tak Kuch Bhi Ejad Nahi Kar Saki Hai. Is Chand Lamhon Ke Zalzaley Ne Jahan Kai Janain Li Wahin Humain Is Baat Ka Ehsaas bhi Dilaya Ke Allah Ke Agey yeh Science Wagera Kuch Bhi Nahi Hai. Allah Jab Chahey Aik Pal Main Humain Apne Pass Bula Sakhta Hai. Agar Hum Thora Sa gour Karain To Humain Andaza Hoga Ke Allah Taala Ne Humain Dikhaya Ke Aaj Science Ki Itni Taraqqi Ke Bawajod Bhi Na Insaan Zalzaley Ko Rok Saka Hai Aur Na Hi Predict Kar Saka Hai. Zalzala Aya Aur Kai Logon Ko Apne Sath Le Gaya Aur Insaan Kuch Nahi Kar Saka. Yeh Sabit Hogaya Ke Science Ki Itni Taraqqi Ke Bawajod Bhi Insaan Qadrat Ke Samne Be Bas Hai Aur Be Bas hi Rahe Ga.

Meri ALLAH Se Dua Hai Ke Allah Zalzaley Main Marne Walon Ki Maghfrit Karey Aur Un Ke Aziz o Aqarib jo Ab Akele reh Gaye Hain Un Ko Sabar Aur Himmat Ata Karey Aur Hum Logon Ko Bhi Islam Par Sahi Tareqqe Se Amal Karne Ki Hidayat Naseeb Karey. Ameen

"BIJLI KA BUHRAN"

Pakistan main bijli ki pedawar buhat kam hai. Aur is ki waja se bijli ka aana jana,bijli ki bandish,black out wagera rozana ka mamool ban gaya hai.Chahe sardi ho ya garmi bijli ki bandish lazmi hai. Baaz dafa mamool ke mutabiq or baaz dafa bagair batae poora din bijli gayab rehti hai.Aur kai baar ka aana jana in logon ke liye bohat c masail paida karta hai jin ka kam bijli se hi hota hai.
Bijli ka na hona bohat bara buhran hai jis ki wja c tamaam logo ko bohat c mushkilat ka saamna karna parta hai chahe wo kic bhi shobe c taluq rakhte hon jec k..talib-e-ilm,mareez,tajir,san'at kar, kissan,mazdoor,kareegar,gharelo aurte wagera.Jis ki waja c hmari muashi,san'ati or zary'e taraqi nahi ho parhi.Bijli k bar bar aane jaane ki waja c  aisi roz mar'ra ki bohat c cheze jo k bijli c chalti hain nakaara hojati hain jec k refrigerator,VCR, television or computer wagera.

Aise bohat se awaamil  hain jo bijli ki pedawar main rukawat ka ba'is bante hain.Jaise ke nehron ki kami,abadi ka barhna,gaon main bijli ki frahmi, hmare mulk main DAMS ki kami wagera.Jab k bijli ki bandish main corruption yani be'emani,gair zimadari,WAPDA walo ki naqis kar kardagi,KAALA BAGH DAM k mansoobe ka poora na hona,zara'ye ka naja'is istimal or hmari hukumat ka dilchaspi na lena shaamil hai.

Pakistan bijli k buhran ki waja c kbhi taraqqi nahi karskta is lye hukumat ko chahye k bijli k buhran ko khatam krne ki har mumkin koshsh ki jaye. Sub c phle to WAPDA ki be'emani,gair zimadari or naqis kar kardagi ko thek karna chahye. Bagair takheer k naye bare DAMS  bnane chahye. Shamsi or atomi tawanai k zarye bijli paida ki jaye. Bijli ki chori ko rokne k ly iqdaam kye jaye or dusri taraf logo ko bhi bijli k istimal main ahtiat karni chahye.Is main koi shak nahi k in iqdamaat ki waja c mulk main bijli k buhran ka khatma hoskta hai.

***Pur Umeed Log*** 

 ALLAH pak ko pur umeed log bohut pasand hain lekin log  aksar ALLAH say umeed rakhny k bajae insano say umeeden  wabasta rakhty hain. Isliye aj kal kay dour mai pur umeed logo ki bohut kami mehsos hoti hay. 

Ajj hi meny aik pur umeed insan ko dekha jiska zikar mai yaha kar rahi hu. Ajj mai jis chinchi mai university say ghar arahi thi us chinchi driver ny apny bary mai kuch batain apny baraber mai bethy shakhs ko batae. Chinchi driver nay bataya kay mainy BA kia howa hay,anglophile say language course or computer courses bhi kiye hoe hain. Achi job ki khuwahish har insan ki hoti hay istarha meri bhi hay par ab tak job na milny ki waja say mai chinchi chala raha hu kyun k mai ALLAH par bharosa rakhta hu or pori umeed rakhta hu kay aik din achi job bhi mil jaegi.chinchi driver ki batain sun k mujhy behad khushi hoi ky dunya mai abb bhi pur umeed log mojod hain jinhy logo say ziada ALLAH pay bharosa hay.

Hame bhi insano say umeeden wabasta rakhny k bajae ALLAH say umeed rakhni chahye aur ALLAH par pora bharosa rakhna chahye ta kay ham ek achi or pur sukoon zindagi guzaar saken.

 

Kamzor Qanoon

Kamzor Qanoon

Kawaneen kisi bhi mulk ki behtri or is k shehri k faide k lie banaye jate hain. Is ki pasdari krna hr shehri per farz hai or is ki khilaf warzi krne per wo sakht saza k mustahiq hote hain.

Hamare mulk me bhi sheriyon ki falah o behbud k lie qawanin banaye gaye hain. lekin hamari badkismati se hamari awam qanoon per amal krne k bajaye in ki khilaf warzi ko apna farz samajhti hai.pakistan me jahan digr kisi qanoon ki pasdari nahi hoti, wahin traffic k qawanin per bhi koi amal krne ko tayar nahi. Hr shakhs is qadr mafad parst ho chuka hai k kisi qanoon ko torne se bhi gurez nahi krta or wo aesa kyun na karen jb qanoon per amal krne se nukhsan or qanoon ko torne se faida hasil ho raha ho.

Aap soch rahe honge k qanoon ki pasdari per nukhsan or qanoon ki khilaf warzi  per faida kis tarha mumkin hai to me yahan un bus drivers or conductors ki baat kr rahi hu jo mehez ziada se ziada kiraya lene k lie logo ko buson ki chaton per bhitha kr logo ki jano per se khelne se bhi nahi ghabrate.Is chiz k khilaf qanoon hone k bawajud aj kal specially Karachi me buson ki ek ajeeb shakal nazar ati hai jahan bus k ander se ziada bus k bahir se awam latakti hui nazar ati hai.

            

Awam to CNG ki loadshedding or is k natije me bason ki tadad kam hone k bais ye qadam uthati hai lekin ye zimedari bus drivers or conductors ki hai k wo is qanon ki khilaf warzi na karen lekin ye us wakt mumkin hai k jb is qanoon ki khilaf warzi krne per un ko saza ya chalan se un ko koi nukhsan ho.

Traffic polilce humen takriban hr ilake me khare nazar to ate hain lekin wo apna emaan is qada bech chuke hain k is qanoon ki khilaf warzi krne per bus drivers k khilaf chalan katne k bajaye mehez 20 ya 50 rupe apni jaib me dal kr logo ko martga huwa chor dete hain. kisi ek ki beimani ka ilzam pure traffic k mehekme ko dena durust nahi, shehr me kai aese traffic police k afsaraan bhi mojud hain jo un k khilaf chalan katte hain lekin afsos k wo chalan bhi mehez 200 ya 250 rupe se ziada nahi hota jis ko bus drivers ek bar ada kr k in 250 k chalan ko pure din istamal kr k ye rakam doguni balke is se shayad char guni rakam kiraya wasul kr k kama lete hain. Agr ye kaha jaye k qanoon ki khilaf warzi kr k un ko faida hota hai to ye galat na hoga.

Is masle ka hal sirf ye hai k hukumat is qanoon ki kkhilaf warzi k khilaf sakht saza ka elan karen ya kam se kam us chalan me izafa kr den ta k bus drivers ko Qanoon i khilaf warzi krne per nukhsan ho. or saath hi CNG ki loadshedding me kami or bason ki tadad me izafa kia jaye ta k awam ko apni manzilon per pohchne k lie apni jano per khelna na paray. 

Karachi Ki Barish..

Kehte Hain Barish Khuda Ki Rehmat Hoti Hai, Be Shak Sahi Kehte Hain Magar Karachi Main Hukumati Idaron Ki Be-Hisi Ki Wajah se Yeh Rehmat Karachi Walon Ke Liye Aksar Zehmat Ka Ba'is Ban Jati Hai. Aisi Hi Zehmat Ka Shikar Karachi Ki Awaam 3rd Aug. 2013 Ki Dupehar Hui Jab Karachi Main is Qadar Taiz Barish Hui Jiss Ne Karachi Main Tabahi Macha di.

3rd Aug. Ki Subha Se Hi Asmaan Main Kaley Badal Chahye Hue The. Khush-Gawar Mousam Ko Dekh Kar Lag Raha Tha Kuch Dair Main Hi Barish Shuru Hojaye Gi. Karachi Main Kyun Ke Bohat Kam Barish Hoti Hai Isliye Sub Log Hi Excited the. Phir Kuch Hi Dair Main Barish Shuru Hogai. Pehle Pehle To Sub Hi Enjoy Karahe The Magar Jaise Jaise Barish Musalsal Taiz Hoti Gayi Wesey Hi Galiyon Aur Sarkon Par Kai Kai Fit Pani Jama Hone Laga. Barish Ne Is Qadar Taizi Iktiyar Ki Ke Sailaab Ki Shakal Le Li Jiss Se Kai Kachey Maqanat Gir Gaye, Takreeban 20 Afrad Lukma-e-Ajal Ban gaye, Naqasi e Aab Na Hone Ki Wajah Se Shehar Ke Ahem Shahrahon Par Pani Jama Hone Ke Ba'is Shadeed Traffic Jam Hogaya, Kai Logon Ki Gariyan/Bikes Pani Main Kharab Hogayain. Log Rozey Main Sarkon Pe Kai Ghantey Madad Ke Liye Kharey Rahe. Akhir Civil Intezamiya Ki Darkhast Par Rangers Ke Jawan Imdadi Qarwaiyon Main Hissa lene Pohanchey aur Barish Main Phansey Logon Ko Nikal Kar Mehfoz Muqamat Par Pohchaya.

Pic Taken By Nisha Salahuddin

Pic Taken By Nisha Salahuddin

Pic Taken By Nisha Salahuddin

Dosri Taraf Humesha ki Tarah KESC ke 400 Feeders Bhi Trip Kar Gaye Jiss Ki Wajah Se Shehar Ka Aik Bara Hissa Tareekhi Main Doob Gaya. Jiss Ko Theek Hone Main Bhi 2 Se 3 Din Lagey. Humare Area Main Bhi Shadeed Ahtejaj Karne Par 2 Din Bad Light Ayi. Aur 2 Din Jiss Tarah Hum Ne Guzarey Woh Hum Hi Jante Hain.

Sawal Yeh hai Ke Jab Pehle Se Barish Ki Peshangoi Ho Chuki Thi To Sindh Hukumat, Baldiya Uzma, Zilaa Municipal Corporation Aur Deegar Idarey Akhir Kiya Karahe The? Pehle Se tamam Intezamat Kyun Nahi Rakhey gaye? Aik Lah-e-Amal Kyun Nahi Banaya gaya?Agar Pehle Se Barish Ke Intezamat Ka Khayal Rakha Jata, Naqasi-e-Aab ke Nizaam Ko Sahi Rakha Jata To Mumkin Tha Itna Nuqsaan Nahi Hota Jitna Ke Is Barish Main Hua.