Sailaab Ki Tabah Kariyaan Aur Hukumat Ka Kirdar...

Pakistan Apni Tareekh Ke Aik Barey Almiye Se Guzar Raha Hai. Mulk Bhar Main 2010 Se Le Kar 2013 Tak Mosamiyati Tabdeeliyon Ki Wajah Se Aney Wale Sailabon Ne Pakistan Ko Kai Saal Peechey dhakel Diya Hai. Sailabon Ne Jahan Aik Taraf Kai Afrad Ki Jaanain Li, Lakhon Afrad Ko Be Ghar Kiya Wahin Dosri Taraf Infra Structure Ki Tabahi o Barbadi Se Hazaron Rupee Ka Nuqsan Alag hua. National Disaster Management Authority (NDMA) Ki Aik report ke Mutabik 2013 Main  Sindh Aur Punjab Main Aney Wale Sailab Main Takreeban 200 Se Za’id Afrad Halak Aur Takreeban 1.5 Million Log Mutasir Hue, 5,615 Gaon Aur Takreeban 20,312 Gharon Ko Shadeed Nuqsan Pohcha. Jab ke Saal 2010 Ka Sailab Pakistan Ki Tareekh Ke Bad Tareen Sailabon Main Shumar Hota Hai Jiss Se Takreeban Pora Pakistan Hi Mutasir Hua tha Jiss Main 1,800 Afrad Halak Aur Takreeban 21 Million Log Mutasir Hue The.

Hum Sub Jante Hain Ke Is Waqt Sailaab Zadgaan Ki Kiya Halat Hai. Na Rehne Ko Jaga Hai Na Khane Ko Roti Aur Na Peeney Ka Saaf Pani.. Kitni Ajeeb Surat e Haal Hain Ke Har Taraf Pani Hi Pani Hai Lekin Peene Ko Aik Bondh Nahi Hai Aur Khane Ko Dana Nahi. Kai afrad Apni Jaan Se Hath Dho Bethe To Kai Khandan Gharon se Mehroom Hogaye. Be Shak Asmani Afat ko Siwaye Allah Ke Zaat Ke Aur Koi Nahi Taal Sakhta, Magar In Afaat se Bachne Ke Liye Hikmat Amli Naam Ki Bhi Koi Cheez Hoti Hai. Lekin Isey Hum Apne Mulk Ki Bad Qismati Hi Keh Sakhte Hain Ke Humare Mulk Main Is Naam Ki Koi Cheez Nahi Pai Jati Jiss Ka Natija Humare Samne Hai. Hukamiti Idaron Ke Sarbarah Har Sailab Ke Bad Logon Ko Aise Sabz Baagh Dikhate Hain Ke Isey Dekh Kar Har Koi Yeh Sochne Lagta hai Ke Ayainda Aisi Tabahiyon Aur Ghaflat ki Nobat hi Nahi Aye Gi. Har Baar Mazboot Hikmat Amli Ke Dawey To Bohat Kardiye Jate Hain Magar Har Baar Hi Lakhon Log Is Afat Ke Nazar Hojate hain.

 

July 2010 Main Sailab Ki Tabah Kariyon Ke Bad Hukumat Ko Is Baat Ka Ehsaas Hogaya Tha Ke Sailaab Ko Roka To Nahi Ja Sakhta Magar Field Warning system Nasb Kar Ke Logon Ko Waqt se Pehle Safe Muqamat Par Shift Kar Ke Jani Nuqsanat se Zaror Bacha Ja Sakhta Hai. Lekin Is Silsiley Main Koi Amli Kam Na Mazi Ki Hukamaton Ne Kiya aur Na Mojoda Hukumaton Ne Is Sisiley Main Kissi Kaam Ka Aghaz Kiya hai Jiss Ka Nitija 2013 Ke Sailab Main Bughatna Para. Mahireen Ke Mutabik Sailaab Ki Tabah Kari Se Bachao Ke Liye Zarori Hai Ke Mulk Main Chote Barey Dam Tameer Kiye Jarain. Agar Pehle se Dam Majood Hote to Guzaishta Kai Saal Se Lagatar Aney Wale Sailabon Se Itna Nuqsaan Nahi Uthana Parta. Lehaza Ab Zarorat Is Baat Ki Hai ke Hukumat Ko Is Janib Pori Sanjeedgi Se Tawaja Deni Chahiye Aur Sirf Jhote Dawon Ke Bajaye Ayainda In Afaat Se Bachne Ke Liye Aik Mazbot Lahma Amal Tayar Karna Chahiye.